Өдрийн аялал #113 - НУРАМТЫН ДАВАА, ХАДАТ БУЮУ НАМРЫН НЭЭЛТ 2021 ОН

Аяллын тэмдэглэл

Нар, үүл, салхи юм юм нь аятайхан таарсан өглөө боллоо. Монгол шилтгээний талбайгаас 8.59 цагт хөдөллөө. Шар хоолой өгсөн шинэхэн тавьсан засмал замаар жийж явахад, урьд жилүүдийн дурсамж сэргэж, муухай зам толь шиг болсныг хоорондоо ярилцаж явлаа. НТГ Д.Гарамдорж (218) биднийг засмал замын төгсгөл хүртэл (50 км) гаргаж өгч үдэв. Нурамтын уужим амны эхэнд ирээд таталт хийв. Нэг шинэ гишүүн маань замдаа утсаа гээсэн тул эндээс буцлаа.

Дараагийн таталтыг Нурамтын даваан дээр хийх тул манай багынхан сунгуухан өгсүүрт жавхаатайхан жийсээр 11.00 цагт даваан дээр гарав. Уулын "мангас"-ууд жирийтэл эргүүлсээр техниктэй өгсөх нь бахдалтай. Энэ удаагийн аялалд шинэ гишүүд нэлээд оролцож, маш сайн жийж байлаа.

Даваан дээр аялагчийн ногоон, шар тэмдгийн болзол хангасан гишүүд тэмдгээ гардан авч, хамтдаа дасгалаа хийчихээд Хойд Баян голын хөндий рүү уруудан 4 км орчим чулуу, өндөр өвс бүхий замаар явсаар гол дээр очиж үдийн хоол идэж амрав.

Доош уруудан сэнгэнэтэл шарика-дсаар Улиастай голыг гарамаар гарах үед цаад эрэг дээр УТА С.Бадрал (177) биднийг угтан (70 км) нэгдлээ. Еэвэнгийн дэлгүүрээс ус, ундаа авч түр амсхийгээд 4 км сунагар, пүнхийсэн халуун салхигүй энгэрээр Хадатын хошуу өөд манай багынхан цувлаа. Багийн тал хувь нь жийсээр, зарим нь түрсээр орой дээр 14.20 цагт гарлаа. Манай баг 26 хүн (нэг бүсгүй)-тэй байлаа.

Хадат уруудах засмал замын эхний хурд сааруулагч дээр нэг шинэ гишүүн унаж тоогүй юм боллоо. УШТГ Ц.Наранхүү нөхрөө асран, хотоос автомашин дуудан эмнэлэг рүү явсан болно. Толгой, тархи, нүүрний яс, гар хөл ноцтой гэмтээгүй гэсэн эхний мэдээ ирлээ.

Нээлтийн аяллын төгсгөлд багийн зарим гишүүд цэцэрлэгт хүрээлэн орж хуушуурдан, аяллын тухай халуун яриа өрнүүлэн амраад гэр гэрийн зүг жирийлгэн одсон билээ. Аяллын зай 80 км. Давааны оноо 7.

Групптэй нэгдэн анхны аяллаа амжилттай хийсэн Б.Чинзориг, П.Хангарьд, Х.Мөнхтэнгэр нар болон аяллын цувааг цоожлон аялсан УШТГ Ц.Наранхүү (069) болон багийн хамт олондоо талархал илэрхийлье. Зүгээр л жий.

Оролцсон гишүүд

• бахархлын тэмдэг
• туулсан замын урт
• өндөр авалтын хэмжээ
• оролцсон аяллын тоо
• оролцсон хоногийн аяллын тоо
• оролцсон олон хоногийн аяллын тоо
• УБ 240/24 челленжийг дуусгасан тоо
• долоон давааны сорилго давсан тоо