Жийлт #42 - ГЭР БҮЛИЙН ХАМТ ДУГУЙТАЙ ЖИЙЛТ

Шөнө болон өглөөгүүр бороотой гэсэн цаг агаарын прогнозыг харгалзан үзэж цуглах цагийг 10:00 цаг болгон хойшлууллаа. Жийлтэд бүртгүүлсэн боловч цуглах цэгт товлосон цагт хүрэлцэн ирж амжаагүй гишүүд жийлтээ хувийн хэрэгтээ тооцуулахыг хүсвэл тухайн өдөр гэр бүлийн хамт дугуйтайгаа "Автомашингүй өдөр" арга хэмжээнд хамрагдсан аль нэг гудамжинд авахуулсан фото зургаа илгээнэ.

Автомашингүй өдрийг тохиолдуулан группийн гишүүдийн дунд "Гэр бүлийн хамт дугуйтай жийлт" зарлаж байна. Гэр гэрээсээ унадаг дугуйтай гарч тогтоосон бүсээр гэр бүлийн хамт жийж өдрийг сайхан өнгөрөөгөөрэй. Зүгээр л жий.

Автомашингүй өдөр арга хэмжээний үргэлжлэх хугацааны ихэнхэд бороо шивэрсэн өдөр болов. Гэвч группийн цөөнгүй гишүүн үүнийг үл хайхран гэр бүлээрээ (хүүхдүүдтэйгээ л дээ) Сүхбаатарын талбай дээр унадаг дугуй хөлөглөн иржээ. 5 дугаар ангид сурдаг гэсэн нэг хүү аавынхаа дугуйг унасан нь нүднээ шууд өртөж байв (ШТГ Б.Баттөмөр). Бас ээжтэйгээ ив ижилхэн ихэр охид (УШТГ П.Золзаяа), аавтайгаа хамт хэзээ язааны мэт жийх хэвлүүхэн хүү (НТГ Г.Түмэнсайхан), бидний дараахан аавтайгаа хамт ирсэн бас нэг хүү (С.Бат-Эрдэнэ) гэх зэргээр энэхүү жийлтэд албан ёсоор бүртгүүлсэн гишүүдийн нийт 7 хүүхэд оролцжээ. Эдгээр хүүхдүүд тун удахгүй группийн халааг авч УБ уулын дугуйн аялал группийн аяллын маршрутыг үргэлжлүүлнэ буй за. Бага настай хүүхдүүдийн зургийг хамаагүй дэлгэж тавих нь зохимжгүй тул уг тэмдэглэлийг зураггүй үлдээв.

Энэхүү жийлтээр манай группийн ахмад гишүүдийн нэг П.Батмөнх ах маань тэмдгийн болзлоо ахиулж шар тэмдэгт гишүүн боллоо. Залуу үедээ үлгэр дуурайлаа үзүүлж, цаашид ахин олон жил жийхийг хичээнгүйлэн хүсье.

Мөн тус өдөрлөгийн үеэр зохиосон марафоны 10 км-ийн төрөлд манай группийн гишүүд УТГ Б.Насанбат, НТГ Ш.Лазина нар оролцжээ. Тэднийг жийлтэд оролцсоноор бүртгэж хувийн хэрэгт нь тэмдэглэгээ үйлдэв. Тэр хоёр маань группийн гишүүд бид бүхнийг ирэх жил болох марафонд бүрэн бүрэлдэхүүнээрээ оролцохыг уриалсаныг энэ ялдамд уламжилъя.