Жийлт #48 - Гэнэтийн жийлт буюу Туул голын голдирол

Бямба гаригт тохиож болзошгүй цаг агаарын (-9 градус) таатай "цонх"-ийг ашиглан Туул голын голдирол даган мөсөн замаар жийнэ. Дүнжингаравын урд талын GS25 дэлгүүрт цуглаад 10.00 цагт жийлт эхлэнэ.

Өвлийн уур аргагүй л уярч, ирж буй цагийн аяст байраа тавьж өгсөн мэт дулаахан өдөр тохиолоо. Цуглах цэгт 9.30 цаг гээд ирэхэд манай багийн ихэнх гишүүд нэгэнт ирээд тавтай нь аргагүй цайлж, яриа дэлгэн сууж байлаа. Энэ удаагийн жийлтэнд хоёр хүн шинээр бүртгүүлээд нэг нь ирээд нөгөө нь ирээгүй тул "аваад явчих" санаатай хоёрыгоо түр үлдээгээд 9:59 цагт гараанаас гарлаа.

Дүнжингаравын алаг цоог цастай дугуйн замаас гарч автомашины зам руу шилжин жийсээр Улиастай голын баруун талын далан дээр хальтхан татаад Туул голын голдиролын замд орлоо.

Халиа тошин тойрон мөс цасан замаар жийсээр... голын нэгэн салаанд хүмүүс бөөгнөрөн мөсөн шагай наадаж харагдана... бид харин дугуй жийсээр, хүн бүхэн голын эрэг бараадан дуртай зүйлсээ хийх юм даа.

Дараалан ойрхон орших гурван гүүр доогуур шурган гарч цасанд хучигдан дагтаршсан жаргалын замдаа орлоо. Хар усан тохойн наана 11.15 цагт ирж түүдэг асаан, өдрийн цай, хоолоо идэн амарлаа.

Буцахдаа ирсэн замаараа голоо уруудан жийлээ.

Хоёр нэгээрээ "мэргэн буудагчид буудуулсан" ч ажралгүй жийсээр Маршалын гүүрийн дор 13 цагт ирж энэ удаагийн жийлт амжилттай боллоо. Шинэ гишүүн маань тун гарамгай жийдэг залуу байна билээ. Халуун баяр хүргье.

Жич: Туул голын голдирол дээгүүр унадаг дугуйтай жийх тохиромжтой зам нэгэнт гарчээ.