Жийлт #69 - Өвлийн туйл буюу Үндэсний эрх чөлөө, тусгаар тогтнолоо сэргээсний баярын өдрийг тохиолдуулсан жийлт

Энэ жилийн "отгон" аялал ес эхэлсэн өвлийн дулаанхан өдөр, цасгүй шороон зам, голын мөсөн гарам дээрх оргилуун дарс, дугуйтай өвлийн өвгөн аав, шинэ жилийн ерөөлийн хамт тун сайхан болж өнгөрлөө.

Аялал цагтаа эхлэв. Өвлийн илч муутай нар хөвөн үүлсийн цаанаас бүүдийж, Туул голын жаврыг сөрөн унадаг дугуйн замаар урагшилж авай. Амгалангийн CU дээр хальт татаад, Улиастайн гол өгсөн ам руу ороход пүн хийгээд салхи араас дэмжлээ. Хотын утаанаас ийнхүү дайжин холдоход уушиг цээж онгойж эрүүл агаар эм гэдэг үгний утга ойлгогдож байлаа.Тусгаар тогтнолын баярын өдрөө хүндэтгэн манай чиглүүлэгч дээлтэйгээ ирж сэвсэлзүүлэн цогтой жийлээ. Алс оронд байсан нэг гишүүн маань гэнэт хажуугаас гарч ирэн, бүгдийг цочоон энэ аялалд оролцсон нь хамгийн сайхан гэнэтийн учрал байлаа. Еэвэнгийн дэлгүүр дээр 12.10 цагт очиж, халуун унд хоол идэж амраад, Улиастайн голын мөсөн гарам дээр Шинэ жилээ хамтдаа угтан оргилуун дарс буудуулан, клубын уриаг байгаль дэлхийд сонсогдохоор хамтдаа дуурсаж, ерөөл өргөв. Ирсэн замаараа пижигнэтэл уруудлаа. Цас бага, зам бараг л шороогоороо байв. Гэр хороолол дундуур гарахад хоолой хорсгом утааны голомт угтан авав.Амгалангийн гармын дэлгүүрийн гадаа 14.20 цагт ирж, бие биедээ шинэ оноо сайхан угтахын ерөөл өргөн тарцгаасан юм. Шинэ онд биднийг олон олон аяллын зам, анд нөхөд хүлээж байгаа. Зүгээр жий.