Өдрийн аялал #27 - СОНГИНО ХАЙРХАН БУЮУ АЯЛЛЫН КИНО

Гишүүдийн статистик мэдээ, 2017 он 3 сар 17 өдрийн байдлаар (зураг 2)

Өнөөдөр шижигнэсэн залуустай нижигнэтэл жийгээд ирлээ. Баг 8 хүнтэй. Цаг агаар тогтуун, тэнгэр бүрхэг, салхины чиг тогтворгүй. Засмал, шороо, дагтаршсан цас, халтиргаатай ялбайсан шавартай 53.4 км зам туулав.

Аялал 10.30 цагт эхэллээ. Амгалан хотхон руу салдаг уулзвар дээр А.Эрдэнэдулам (068) биднийг гүйцэн ирэв. Сайн жийдэг залуу шүү. Өлзийт хорооллын "золбин" замаар нисэх мэт хурдалсаар Туулын хар шугуйд орших Тоорил ханы түүхэн гэрч болсон буурийг үзлээ. Сонгино хайрханыг ороон шороо, ялбайсан замаар өгсөн жийсээр 13.10 цагт Шар хөвийн дөрөлж дээр ирж үдийн хоол идлээ.

Сонгино хайрханы зүүн хойд үзүүрийг эмжин ялбагнуулан уруудаж Сонгино дээр ирж шууд Морингийн даваа өөд зүтгүүлэн гарлаа.

Нисэхийн дэлгүүрийн гадаа cola-даад аялал эхэлсэн газар 15.30 цагт ирсэн болно. Гишүүн С.Батмөнх (037)-ийн зохион байгуулсан аяллын аюулгүй хантааз ирсэн ба өмсөж жийхэд (тод ногоон өнгөтэй) биенд эвтэйхэн, холоос харагдах байдал сайн байлаа.

Бидэнтэй анх аялаж аялагч гишүүн болсон Г.Түвшинтөгс (067), А.Эрдэнэдулам (068) нарт болон багийн гишүүдэдээ талархал илэрхийлье. Ийм сайхан аялал түүх болон үлдлээ.