Өдрийн аялал #39 - ХАРГАНА БУЮУ ЗУНЫ ХАЛУУН ӨДӨР

Группийн түүх: 2017 оны VI сарын тайлан (зураг 4)

Товлосон газар 14 аялагч цуглаж, 8.30 цагт аялал эхэллээ. Манай группийнхэн шуурхайхан жийсээр Санзай, Бага Баян амралт өнгөрч Харганын урд хөндийд 11.30 цагт ирлээ. Уулын замаар ой мод дундуур уруудан өгсөж Харганы даваа уруудан Шар жалгын ам руу орсон бүдэг замаар уруудлаа. Гишүүн А.Тэмүүжин (073) толгойн сэргийлэх хийж аюул осолгүй уруудах замыг бидэнд гаргаж өгсөн болно.

Урсацгүй болж хөрсөнд шургасан жижиг голын хөвөө бараадан 12.30 цагт үдийн хоол идэв. Үдлэгээр дайрч cola-даад баруун зүг жийж Бамсүмбэрийн засмал замтай нийлэн Ногоон толгой, Жаргалант суурин (бас л cola-дав)-гаар өнгөрч Шижирийн баг руу салсан шороон замаар жийж Тахилтын даваа руу зүтгэлээ.

Маш халуун өдөр таарсан тул аялагч нар шингэн их алдаж байлаа. Ерөөсөө 30-40 минут тасралтгүй нэг хэмээр жийхэд хүний бие бараг л дотроосоо "хуурайшиж" байсан.  Тахилтын даваа дээр 17.00 цагт гарч амраад доош уруудан 18.00 цагт Тахилт, 18.40 цагт Орбит, 19.30 цагт хотын төвд ирж аялал амжилттай дууслаа. Аяллын зай 113 км.

Манай гишүүд өнөөдөр маш сайн байлаа, ийм хамт олон ямар ч бэрхшээлийг давж зорьсондоо хүрдэг гэдгийг бид өөрсдөө харлаа, үзлээ, баталлаа.

Группийн аялалд нэгдсэн сайн дугуйчин, даруухан залуу Хашбагана (101), Мерида клубын дугуйчин аяллын "disc jockey" Б.Батжаргал, кино зураглаач С.Батсуурь (063) нар болон бусад найз нартаа талархал илэрхийлье.